Bistrîne Xalo

Bistrîne Xalo






Diyarî bo hunermend Tîrêj Ormiye





Hooo xalo!
Bistrîne ,bistrîne…
Ji rojê re,
Ji axê re,
Ji evînê re bistrîne xalo.
Ji bîr neke qurban!
Darbestên vejînê li peyvê xweke
Reşgirêdana şînê jibîr bike
Û di roniya eşqa rojê de welatê min şîrove bike.

Bistrine xalo!
Ji şemamê re,
Ji xerîbîyê re,
Ji hesretê re bistrîne .
Qet raneweste …
Bila ji rûyê te
Bila ji lêva te
Bila ji awirên te
Bila ji kenê te hezkirin bibare
Û bibe baran di ziwabûna axe de xalo!

Erê xalo!
Ji her du çeman re,
Ji Amedê re,
Ji Hewlêrê re,
Ji Mahabatê re,
Ji Qamişlo re bistrîne
Û bi dengê xwe sînorên bendemanê
Di hawara zînan de hilweşîne.
Lê jibîr neke!
Wan serpêhatiyan di temenê xwe de hilgire
Û her toveke wê
Li ser dilê beyar biçîne
Û bi awazên çiyan wan şîn bike,şîn bike xalo!
De bistrîne xalo,ji hêviyên winda re !