BAJAREK DIGRÎ

BAJAREK DIGRÎ





Bajarek
Di nava xweziyên demborî de
Li kewandina birînên xwe digerê û dem dikenê…!
Ger ser nizim ser nizim
Li dîmmenên serjêkirî
Ku li kolanên bajarê cemedê sirûda miriyên zindî dixwîne, temeşe dike.
Li xwe û li rojên dimrin!
Li xwe û li zarokên di nava dewlemendiya bê sînor de
Li ber deriyê mizgeftan destê xwe ji xelkê re vedikin.
Li xwe û li zarokên ji hembêza dayikan
Berê xwe didin bajarê goristanan temeşê dike
Û digrî hey digrî…
De bigrî bajaro bigrî
Ji êşên xwe …ji birîna nekewandî.





Bajarek
Li ser tifikên vemirî
Li ser tîrêjên xeyidî
Li ser gulên çilmisî
Li ser hêviyên di sêdaran de tên daleqandin digrî.
Bajarek digrî hey digrî…!






Digrî ev bajar li ser
Xewnên di nava tirsê de xwe veşartîn
Digrî ev bajar li ser sêwiyên bê welat
Digrî ev bajar li ser
Keçên porê xwe kurt dikin û
Li ber çemê xeman ber didin
Digrî ev bajar li ser darên kurim girtî
De bigrî bajaro giriyê te giriyê welatekî ye bajaro.